Зюгшпице - Германы хамгийн өндөр цэгээс...

Будапештээс өглөө 5 цагт буугаад 9 цагт нь Германы хамгийн өндөр цэг болох Зюгшпице оргилыг эзлэхээр аялалдаа гарлаа. Энэхүү уул нь Герман болон Австрийн хил дээр байрладаг, байгалийн үнэхээр гоёмсог тогтоц бүхий цогцолбор хэсэг юм. Уулын оргилд гарах хэд хэдэн боломж байдаг бөгөөд мэргэжлийн уулчид 3 газраар нэг юм уу хоёр өдөр авирч, харин сонирхогчид болон жуулчид орчин үеийн техникийн дэвшлийг нэвт шингээн бүтээсэн олсон шатаар дамжин 5 минутын дотор 2 ч газраар аялах боломжтой.
Эхнийх нь Гармиш-Партенкирхенээр дамжих буюу Германы газар нутгаас, нөгөө нь Эрвальдаар дамжих буюу Австрийн газар нутгаас оргилд гаран хоорондоо огтлолцдог байна. Дээхэн үед Австри Герман улсууд уг уулаар хилээ тогтоодог байсан ч Шенгений гэрээний дагуу өнөөдөр энэ хил байхгүй болж хэн хүссэн нь нэвтрэх боломжтой болсон юм. Тэнгэр цэлмэг үед Зюгшпице оргилоос 4 улсын хилийг харж болно. Швейцарь, Италийн хилийг тогтоодог уулс энэ уулнаас харагддаг бөгөөд жилийн 4 улирлын турш жуулчдаар тасардаггүй, Германы төдийгүй Европын аялал жуулчлалын томоохон төв юм.
--------------------------------------------------------------------------------------------------------------------------------------------------------
1-р хэсэг: Зюгшпице хүрэх замд
Германы өмнөд хэсэгт Баварийн Альпийн нурууны харьяат Зюгшпице оргил руу Мюнхенээс ойролцоогоор 2 цаг орчим машинтай явж очдог юм байна. Ер нь бол тийшээ галт тэргээр ч гэсэн очих боломжтой бөгөөд аялал жуулчлалын энэхүү бүсийг даган маш олон жижиг жижиг хотууд, тосгонууд хөгжсөн бөгөөд бүгд өөр өөрсдийн гэсэн онцлогийг харуулсан үйлчилгээний төвүүд болон хуучны түүхийг илэрхийлэх барилгууд, байшингуудаа хадгалж үлдсэн нь сонирхолтой байлаа. Бавари уламжлалын дагуу бүх айлууд нь байшингаа болон хашаагаа ургуулсан цэцгээр чимэглэсэн байсан нь эдгээр хотуудын улам цэмцгэр, улам тохилог харагдуулж байсан. Оргилын харьяалагддаг Гармиш-Партенкирхен хотод 1936 оны өвлийн олимп болж байсан бөгөөд хоккей гэх мэт өвлийн спортыг илүү хөгжүүлсэн мэт санагдсан, энд 2011 оны Уулын цанын ДАШТ болно хэмээн хаа сайгүй зар гарсан байлаа...Мөн энд Дэлхийн 2-р дайны дараа АНУ-ын цэргийн бааз байгуулагдсан бөгөөд доорх зурагнуудаас хашаанд байх шар байшинтай зураг бол тэр баазын зураг юм. Тухайн үед АНУ-ын цэргүүд нутгийн ард иргэдэд англи хэлний хичээл заах зэрэг соёлын маш олон хөтөлбөр хэрэгжүүлж байсан бөгөөд дөнгөж 10-аад жилийн өмнө нутгаа орхин гарсан ч маш олон айлууд үлдсэн нь АНУ-ын тугийг үүдэндээ өргөсөн цөөнгүй айлтай тааралдснаас харж болох байлаа...--------------------------------------------------------------------------------------------------------------------------------------------------------
2-р хэсэг: Зюгшпицег эзлэх зам...
Зюгшпицег 19-р зуун хүртэл албан ёсоор хэн ч эзлээгүй байсан юм байна. Хэдийгээр өмнө нь нутгийн иргэд хэд хэдэн удаа авирч байсан тухай байдаг ч 1820 онд хурандаа Ж.Неулээр удирдуулсан 3 хүний экспедеци авирсныг анхны эзлэлт гэж үздэг. За тэгээд удалгүй суусан газраасаа шороо атгаж сурсан "хөдөлмөрч" Германчууд энэхүү оргилыг ашиглахаар шийдэн 1928 он гэхэд хэд хэдэн төвүүдийг барьж, улмаар хэдхэн минутын дотор хэн ч гарчих боломжтой Зюгшпицебаныг барьсан аж. Удалгүй уулыг нүхлэн нүхэн галт тэрэг гарган, түүгээр дамжуулан уулын ойролцоо байрлах Эибсее нуурыг үзэх боломжоор ханган, жуулчдыг бүхий л талаар нь татаж эхэлжээ. Мөн Европын хамгийн өндөрт байрлах цаг агаарын судлалын төв байрладаг. Доор зурагнуудаас энэхүү олсот тэргээр 2960 метрийн өндөрт гарж байх үедээ авсан зурагнуудыг үзээрэй. 3 том цамхагаар дамжуулсан урт олсоор дамжин дээшээ гардаг, гарах үед ямар мэдрэмж төрснийг илэрхийлэхэд Уундаагийн үгийн баялаг дутаж байнаа гэжэ...Айдастай хэрнээ биширмээр сэтгэгдэл төрж, үүлтэй зэрэгцээд хүрээд ирэхээр доодох юмс жижигхэн харагдаж, байгалийн агуу их үзэсгэлэн, сүр хүчийг хүндэлмээр, хайрламаар, бахархмаар болж байлаа.
--------------------------------------------------------------------------------------------------------------------------------------------------------

3-р хэсэг: Зюгшпицег эзэлсэн минь...
2962 метрийн өндөрт бүхэл бүтэн хот оршиж байлаа...Энд та хүссэн хоолоо үзэсгэлэнт үүлсийн дунд зооглож болно. Шар айргаа шимэн суунгаа Европыг дээрээс нь тольдон харж чадна. Үнэгүй интернэтээс найз нөхөд рүүгээ мэйл явуулан мэндчилгээ дэвшүүлэн, энергиэ дамжуулж болно. Бэлэг дурсгалын зүйлсийн дэлгүүр, хүнсний дэлгүүр, архины дэлгүүр ч бий, бүр зурагт үзэж, утсаар ярьж, улам ойртсон тэнгэрийг ширтэн хэвтэж, бүр хүсвэл унтаж ч болно. Цасаар тоглож, өвөлдөө сноубординг, цана чаргаар гулгах ч боломжтой.
Уулын оргилд том хөшөө босгосон бөгөөд түүн рүү авирахыг хүсвэл илүү бартаатай хамгаалалтгүй замаар аюултай шатаар авирах хэрэгтэй болно. /түүний өмнө зургаа авахуулсан байгаа, уул нь авиръя гэж байсан ч цагаас болоод гарч чадаагүй./ Мөн уг уул, байгууламжийг хэрхэн эзэлж, байгууламж барьсан түүхийг харуулсан музейтэй юм байналээ. За тэгээд элдэв зүйл нуршилгүй Зюгшпице оргилоос авсан зурагнууд руугаа орцгооё...

--------------------------------------------------------------------------------------------------------------------------------------------------------
4-р хэсэг: Зюгшпицегээс буцах зам...
За тэгээд хэрвээ та илүү мөнгө төлж тасалбар авсан бол буухдаа уг уулыг нэвтлэн барьсан туннелээр явдаг галт тэргээр дамжин буух боломжтой юм байналээ. Доор зурган дээр хэрхэн явдаг зураг нь байгаа. Хамгийн өндөрт гарсан аялал маань энерги-эрч хүчээр цэнэглэгдээд, хийморио сэргээж, цэврээс цэвэр агаарыг амьсгалчихаад, бахархал-хүндэтгэлийн нэгэн зэрэг хэд дахин мэдэрчихээд уг бүс нутагт байрлах хэд хэдэн үзэсгэлэнтэй газруудтай танилцснаар өндөрлөсөн юм. Дор зурган дээр Кохен нуурын эрэг дээрээс авсан зурагнуудыг орууллаа, бусад сонирхолтой мэдээлэл, зурагнуудаа дараа жич оруулах болноо...